ACNE 101

بما أنه هذا أول بوست لي ، حبيت يكون بوست مميز عن الي بطرحهم مستقبلاً و يكون كـ مرجع لكل بنت عاشت حياتها و هي تعاني من الحبوب و الاثار

لا يمكن تحلين مشكلة و انتي ما تعرفين سببها ، لازم كلنا نعرف الاشياء البيسك عن بشرتنا عشان نعرف نتعامل معاها

البنت الي تعرف نوع بشرتها و تلاحظ ابسط الاشياء و تعرف من شو تتحسس و تعرف الي يناسبها والي ما يناسبها ، اعتقد هي اللي بتمشي اوكيه مع اي شي تاخذه

قبل لا ابدا في الموضوع حابة اكتب كم نصيحة مهمة امشوا عليها و ما بتفرون اي منتج في الزباله و اضمنلكم فلوسكم ما بتضيع على الفاضي ، خلاص نحن في ٢٠١٨ مفروض نستوعب الي قاعد يصير من اعلانات تجارية تعد نصب و احتيال و

 لا هم ما يهمهم غير الفلوس

:أولاً-

لازم تعرفين المواد الفعالة اللي فيه عشان تشوفين لو بيناسب حالتج و لا لا  ingredients  أي منتج قبل لا تاخذينه اقري الـ

أي حساسية أو أي ردة فعل في البشره بتكون بسبب هالمواد الفعالة لأنها هي المكون الرئيسي في المنتج نفسه

!بوست ثاني بكتبه عن هذي المواد و منها احماض و مهم تعرفون كل واحد و شو يسوي و فايدته

:ثانياً

لا تاخذين لا تاخذين لا تاخذين منتج بس لأنه فلانه نفعها حطي في بالج انه الي يفيدج ما بيفيد غيرج ، الي فادها ما بيفيدج ، الكريمات اللي تعالج هذي خط احمر تحتها تسعين مره ما يصير تاخذونها بدون وصفة دكتور  ، الحين بتقولون عادي كل حد يحط صورها حتى الدكاتره في انستقرام و و و  ، المصيبة مش هني ، المصيبة لو تستخدمين وياه كريم ثاني من مدح شخص ثاني لأنه فيه مواد فعاله تخرب على بعضها ، فيه مواد لو اجتمعت بتكون ليلتج سودا بتقومين و ويهج ليتات . حمر بس باقي يعلقونج ياللمبه في صالة عرس ، التمكيس هذا سويه في ارواج في مكياج بس كريمات ابداً لا لا لا لاااااااا

:ثالثاً

 لا تحطين أمل... في منتج واحد و تتوقعين انه بسبته هو بتقومين و ويهج مرايه ، يعني فرضاً تخيلي معاي شغل قروب ، بيكون فنان لو كلهم تعاونوا و ما فيه كره بينهم و ما فيه حد بيخرب على الثاني ، شغلهم و الرزلت بيكون خياااال عكس بروجكت فيه بنت وحده بيكون عادي ، و اللي اقصده انه لو عندج مشكله غيري الروتين كامل غسول كريم و سيروم و تونر على حسب احتياجج ، ترى ما يخصه كل ما زادت المنتجات كل ما كان احسن لااا ، فيه بشرات ما تتحمل و المشكله انه نحن كل شي نسويه غلط فـ لا تجازفين و تحطين تسعين طبقه من كريم مدحته فلانه ، الجلد ما يتحمل ابداً بتخربين السكن بارير و بتزيدين الطين بلة. الحين بتقولون قلتي لا تحطين امل في منتج استخدمي روتين كامل بس بعدين قلتي لا تستخدمين وايد منتجات.. الفرق بين الجملتين و الخلاصة انه لو ويهج يبا نظاره استخدمي غسول و كريم مرطب و سيرم يعطونج هالنتيجه لو تبين لووووو تبين زيدي تونر عادي.. بس تغسلين ويهج تسعين مره في اليوم و تحطين ثلاثين كريم و كل دقيقه تروحين عند المرايه تحطين اكرتين و فليل و انتي راقده مادري شو تسوين لا هذا غلط الشي لو زاد عن حده بيسويلج اعراس في ويهج

:رابعاً

لا تقارنين نفسج أبداً بوحدة مشهوره أكبر همها مكياج ، انا ما استنقص منهم بالعكس دورهم مفيد بس انتي ما تعرفين حياتها ما تعرفين شو تسوي من ورا الكاميرا تدفع الآف الدراهم للعيادات بوتكس شد و فيشلز  و و و و ، و اهم شي انها هي كبيره خلاص ما بتطلعلها حبوب نفسج انتي اللي في مرحلة مراهقه و هذا شي طبيعي جداً ، من توصلين الخمس و عشرين الحبوب بتمل منج و بتختفي ( في بعض الحالات لا بس مقارنة بالمراهقة بتخف) يعني هي كل يومين في عيادة و ما عندها شغله غير هالويه ، انتي تدرسين و ضغط نفسي و حالتج حالة اكيد ويهج بيتعب و ما تقدرين تلحقين تروحين و تسوين انا اعرف و كنت في هالوضع ايام الثانوية زين مني احط كريم مرطب و ما يهمني خلاص.. ابداً مش عيب انه الوحده تطلعلها حبه و او فيها اثار هذا شي طبيعي طبيعي لا تتفشلون عادي

:خامساً

كوني حيادية يوم بتاخذين شي يديد ، يعني لا تتحمسين وايد و في نفس الوقت لا تشككين فيه.. انزين ليش؟ هذا  بشرحلكم إياه بشكل

 placebo effect مبسط اسمه بلاسيبو إفكت 

هذا التأثير ينتج عن التفائل بزيادة و الحماس ، بتتخيلين انه المنتج سوالج العجب من ثالث يوم و تقولين الله ويهي صار احسن عن قبل ، في الاساس تعرفين شو؟ انتي تتخيلين هذا كله وهم و ما تغير شي في ويهج ، سووا تجربه على مجموعتين من الناس و فيه قروب عطوهم حبوب ما فيها شي ما تسوي شي و مالها ابداً اي تأثير في الجسم ، بعد فترة قالولهم حسيتوا بتحسن قالوا هييه وايد فادنا العلاج ، عفواً بس اي علاج؟ قصوا عليهم و قالولهم انه دوا و هو اصلاً و لا شي

نفس الموضوع يمشي على لصقات الجسم الي تضعف و الي تعالج مادري شو هذي كلها بلاسيبو افكت انتبهوا و عشان تتجنبون هالغلط كل اسبوع صوروا ويهكم بفلاش و بدون فلاش و تموا قارنوا بين النتايج عشان بعيونكم تشوفون لو فيه تحسن و لا لا

. . . . . . . . . . . . . . . . . . . . . . . . . . . . . . . . . . . . . . . . . . . . . . 

تبدأ مشكلة الحبوب أساساً من انسداد المسامات  ، او

 comedones //  clogged pores

 و تنقسم لنوعين إما رؤوس بيضاء أو سوداء ، كيف تتشكل؟ الزيوت الموجوده مع الكيراتين بيسدون بصيلة الشعر ، بيتم مفتوح و بتصير عملية أكسدة و هي اللي تخلي اللون الأسود يطلع (معرض للهوا)  و لو غطاها الجلد بتكون بيضاا

الرؤوس السودا بتتكون بسبة الزيوت مثل ما قلت و الجلد الميت  بيتجمعون عشان يكونون هالحبوب السودا الصغيرة ، الي بيتأكسد فيهم هو الزيت مع الهوا ، علاجها سهل جداً بدون دكتور او صيدلاني

 البيضا مشابهه بس مش معرضة للهوا فبيتم اللون عادي ابيض الزيت بيتم محبوس تحت الجلد ما بيقدر يطلع لبرع ، العلاج ايضاً نفس الرؤوس السودا تقريباً

blackheads

whiteheads

الأسباب تكون بسبة انتاج الزيوت بكمية أكثر تحت تأثير الاندروجين ، الاندروجين هو هرمون الاستروجين و البروجسترون هذيل لو ارتفعوا بتطلع الحبوب ، عشان جي قبل الدوره بأسبوع تقريباً تطلع الحبوب ، بسببهم

  

:الحبوب تصنف لأنواع على حسب شكلها اللي فوق هم البيسك اعتقد بعدين تتطور الحالة إلى أحد هالأنواع

Inflammatory

 papules

هذي الحبوب فيها تهيج لونها أحمر و هي اللي تحسون بألم يوم تلمسونها فـ يفضل تبعدون عنها و ما تلعبون فيها ، عشان ما تتكون حفر و أثار بعد ما تختفي ، أيضاً تتكون بسبب الجلد الميت ومسامات منسدة.. ما فيهم السائل اللي يسمونه القيح بالعربي لونه أصفر/بيج

 و من أسبابها أيضاً نوع من انواع البكتيريا دوروا عنه لو حابين تعرفون أكثر 

Propionibacterium acnes

pustules 

 هذي الحبوب اللي فيها السائل الأبيض الأصفر البيج مهما كان لونه ، هو عبارة عن خلايا دم بيضا مسكينه ميته ، مع دهون و بكتيريا :(

زعلت صراحه ضحت بنفسها هالخلايا عشان تهاجم البكتيريا و طلعت على سطح الجلد عشان تراوينا هالتضحيه ، شفتوا كيف جسمكم يحبكم؟

حاولوا ما تلعبون فيها عشان ما يطلع السائل و يحوس المكان و يمكن تطلع حبوب ثانيه في نفس المنطقه

Nodulocystic

 nodules 

هذا النوع حجمه أكبر و يطلع تحت الجلد ، ما فيه سائل هذي لو طلعت تروحين عند دكتور جلدية لازم ، لأنه علاجها صعب و ما تتعالج بسرعة ، أسبابها مشابهه للبقية بس العلاج نار و شرار

cysts

هذي بعد علاجها مع دكتور جلدية لازم لازم لازم ، ما تروح بسرعه و بتترك أثار حفر على الويه لو ما عالجتيها في الوقت المناسب مع العلاج المناسب ، من اول يوم مفروض يتم العلاج لا تأجلين أبداً

مشابهه للي قبلها بس هذي فيها شوية سائل هذا هو النوع الي يشوه الويه ترى انتبهوا بنات ، اي علاج يناسب القبليين ماله فاعلية على هالنوع و الي قبله ، هني لازم مضاد حيوي و اذا كان بسبب هرمونات احتمال الدكتور يعطيج حبوب منع الحمل عشان تنظم الهرمونات مع كريمات فيه مشتقات فيتامين ايه

هذي صورة للعائلة كلها 

. . . . . . . . . . . . . . . . . . . . . . . . . . . . . . . . . . . . . . . . . . . . . . 

في النهاية الوقاية خير من العلاج ، لو سبب الحبوب تم موجود حالتج بتصير أخس هذي لستة أشياء و نصايح سريعه خفيفه لتجنب المأساة قبل لا تطلع

غيري لبس المخده بين فتره و فتره لأنه هالمكان تتجمع فيها الأوصاخ انتي ما تشوفين بس موجود كل شي هناك و وقت النوم المفروض الجلد يتجدد و تستوي بارتي في الجلد ف لا تخلين المخدة و الوصخ اللي عليها يخربون البارتي بليز

 لا تلمسين ويهج ، البكتيريا الموجوده هي العدو اللدود شلي معقم لو انتي وايد اوبسسد و كل شي تحبين تتأكدين انه ويهج ما طار 

البيوتي بلندر تغسلينها قبل و بعد كل استخدام انصدمت يوم عرفت انه شي بنات ف الشهر كم مره يغسلونها بعدين يقولون ليش تطلع حبوب صغيره؟ بسبب البكتيريا مسويين بيت في البلندر مالتج ، احسن غسول او صابون او وات اڤر هو اللي من الشركة نفسها القالب فنااان ينظف ينظف ، و بعد ما تنظفينها رشي عليها كحول يناسب الويه عشان ما تتحسسين

فترة العلاج يفضل انج ما تحطين مكياج عشان ما تلعوزين ويهج في فترة الريكڤري يعني ترضين حد يطري شخص عندج و انتوا متضاربين من كم يوم؟ 

واقي الشمس المعطر هذا قوليله باي باي ، الناس ما يعطرون ويههم ترى محد بيشم ويهج ، ما ادري ليش عادي عندكم تاخذون منتجات معطره ترا هذي تسبب ردة فعل لمبة الأعراس الحمرا في الويه

يفضل الكريم اللي ينعصر احسن من الي تشلين بصبعج ، و يوم بتحطين كريم او محلول على الحبوب حطي بقطنه انتبهي تحطين بإيدج ، و نفس ما قلتلج لا تيلسين تخلطين كريمات يام الخلطات ، ترضين وقت الامتحان الدكتور يدخل تسعين جابتر مره وحده؟ نفس الشي  ينطبق على البشره يا عيوني بتنهار

اذا الحبوب كانت قريبه من خط الشعر هذا معناته بسبب شامبو او زيت او سبراي شعر ف حاولي تقللين منه او تغيرينه ، اما الصوره الي جلطتني هذي ، غلط ماريد اشوفها مره ثانيه بليز

هذا كله غلط الحبه ما بتيلس تسوي اجتماع مع ويهج عشان يقررون وين بتطلع ، المكان الي بتطلع فيه بتطلع فيه

باختصار المشاكل كلها بسبب الزيوت و الجلد الميت و بصيلات الشعر و البكتيريا و الهرمونات هذي الخلاصه ، على فكرة ، الچوكلت ما يسبب حبوب و اللي رايه عكسي يقولي عشان ادخله في البلاك لست